धेरै जाल बुनियो : उहि बुडिको प्यारो भो गुनियो

पुष्पकमल दाहाल नेतृत्वको माओवादी केन्द्र र बाबुराम भट्टराई नेतृत्वको नेपाल समाजवादी पार्टीबीच एउटै चिह्नमा प्रतिनिधिसभा र प्रदेश सभा चुनावमा सहभागी निर्णय गरेका छन् । सात वर्षअघि माओवादी छोडेर वैकल्पिक राजनीतिक शक्ति निर्माण गर्न हिँडेका भट्टराई पुन: माओवादीसँग चुनावी सहकार्यका लागि जोडिएपछि यसले अब पार्टी एकताको आधार खडा गरेको छ ।
दुवै पार्टीका नेताहरुका अनुसार अहिले चुनावी मोर्चाबन्दी भएपनि नाटकीय रुपमा कुनै घटनाक्रम विकसित भएन भने आगामी प्रतिनिधिसभा र प्रदेशसभा निर्वाचनपछि दाहाल र भट्टराई एउटै पार्टीका नेता हुनेछन् ।
माओवादी केन्द्रको चुनाव चिह्न हसिँया हथौडाबाट चुनाव लड्ने भट्टराईको निर्णय तत्कालका लागि निर्वाचन जित्ने रणनीतिक कदम मानिए पनि यो मंसिर लगत्तै पार्टी एकताको बलियो आधार भएको उक्त पार्टीका नेताहरुले ठानेका छन् । जसलाई पुष्टि गर्नेगरी म‌ंगलबार साँझ भट्टराईले तस्बिरसहित ट्वीट गरेका छन्- ‘नयाँ यात्राको सुरुवातमा गम्भीरता र खुसी !’ उनले माओवादीसँगको मंगलबारको बैठकपछि ‘बृहत् अग्रगामी शक्तिको ध्रुविकरण गर्ने लक्ष्य’ अनुरुप माओवादीको चिह्नमा लड्न लागेको बताएका थिए ।मा‌ओवादी अध्यक्ष दाहालले पनि ‘बाबुराम र प्रचण्ड एकै ठाँउमा उभिनु अर्थपूर्ण छ’ भन्दै भावी गन्तव्यको संकेत गरेका छन् ।
दाहाल र भट्टराईबीच चुनावपछि समाजवादी केन्द्र बनाउने मोटामोटी सहमति भैसकेको अध्यक्ष दाहालले मंगलबार सार्वजनिक रुपमा बताएका छन् । समाजवादी केन्द्र बनाउन माधवकुमार नेपाल मात्र मिल्नु आवश्यक छ । वामदेव गौतम त अहिले नै गोलाकारभित्र हँसिया हथौडामा चुनाव लड्ने सहमति गरिसकेका छन् ।