श्रम मन्त्रीले हरेक आइतबार प्रत्यक्षरूपमा गुनासो सुन्ने

काठमाडौं : श्रम, रोजगार तथा सामाजिक सुरक्षा मन्त्री शेरबहादुर कुँवर आगामी आइतबारदेखि सेवाग्राहीसँग समस्या तथा गुनासो सुन्ने ‘श्रमिकसँग श्रममन्त्री’ कार्यक्रम शुरूवात गर्ने भएका छन् ।

श्रम, रोजगार तथा सामाजिक सुरक्षा मन्त्रालयमा रहेको श्रम कल सेन्टरमार्फत अब हरेक आइतबार बिहान ११ बजेदेखि १२ बजेसम्म सेवाग्राहीसँग समस्या तथा गुनासो सुन्ने व्यवस्था गरिएको मन्त्रालयले जनाएको छ ।

मन्त्रालयले आफ्नो समस्या, गुनासो तथा सुझाव राख्न नेपाल टेलिकमको टोल फ्रि नम्बर ११४१, मन्त्रालयको टोल फ्रि नम्बर १६६००१५०००५, ल्यान्डलाइन नम्बर +९७७–०१–५९७०००८, ह्वाट्स एप र भाईबर ९८०१३०००३३ र फेसबुक आईडीमार्फत सम्पर्क गर्न सकिने बताएको छ ।

हरेक आइतबार एक घण्टा प्रत्यक्षरूपमा हुने कार्यक्रममा स्वदेश तथा विदेशबाट समस्या राख्न सकिने मन्त्रालयले बताएको छ । मन्त्री कुँवर राजधानी बाहिर रहेको अवस्थामा भने श्रमिकसँग श्रममन्त्री कार्यक्रम नगरिने मन्त्रालयले जनाएको छ ।